G.H.S.S. ADOOR

കേരളത്തിലെ വിദ്യാര്‍ത്ഥിസമൂഹം ഇന്ന് തങ്ങളുടെ പഴയ സഹപാഠിയെ വരവേല്‍ക്കുവാന്‍ തയ്യാറെടുക്കുകയാണ്. 'ഓണപ്പരീക്ഷ തിരിച്ചുവരുന്നു' എന്ന വാര്‍ത്ത കേട്ടപ്പോള്‍ പെട്ടെന്ന് ഞെട്ടലുണ്ടായി. സ്വാഭാവികം! എന്നാല്‍ പിന്നീട് അവരുടെ മുഖത്ത് പ്രസരിച്ചത് സന്തോഷമാണ്.

ഓണപ്പരീക്ഷ തിരികെ കൊണ്ടുവരാന്‍ തീരുമാനിച്ച സര്‍ക്കാരിന് വിദ്യാര്‍ത്ഥിസമൂഹത്തിന്റെ അഭിനന്ദനങ്ങള്‍. ഓണപ്പരീക്ഷ നടത്തുന്നത് വിദ്യാര്‍ത്ഥികളുടെ പഠനനിലവാരം മെച്ചപ്പെടുത്തുവാന്‍ വളരെ സഹായകരമാണ്. കഴിഞ്ഞ രണ്ട് വര്‍ഷങ്ങളിലായി നടന്ന അര്‍ദ്ധവാര്‍ഷിക മൂല്യനിര്‍ണയം(Mid Term Evaluation) വിദ്യാര്‍ത്ഥികള്‍ക്ക് വളരെയധികം പഠനഭാരം നല്‍കിയിരുന്നു. കൂടുതല്‍ പാഠഭാഗങ്ങള്‍ പരീക്ഷക്കായി ഒന്നിച്ചു പഠിക്കേണ്ടി വരുന്നത് പ്രയാസകരമായിരുന്നു. എന്നാല്‍ ഓണപ്പരീക്ഷ തിരികെ വരുമ്പോള്‍ ഓരോ വിഷയത്തിന്റെയും മൂന്നോ നാലോ പാഠങ്ങള്‍ മാത്രമാണ് വിദ്യാര്‍ത്ഥികള്‍ക്ക് പഠിക്കേണ്ടിവരിക. അതും അടുത്തടുത്തായി ക്ലാസ്സ് ടെസ്റ്റുകള്‍ക്ക് പഠിച്ച പാഠങ്ങള്‍. അതുകൊണ്ട് തന്നെ ഓണപ്പരീക്ഷ വിദ്യാര്‍ത്ഥികളുടെ പഠനനിലവാരം മെച്ചപ്പെടാന്‍ കാരണമാകും.

പല വിദ്യാര്‍ത്ഥികളിലും പരീക്ഷ എന്ന് കേള്‍ക്കുമ്പോള്‍ തന്നെ ഒരു ഭയം ഉളവാകുന്നു. എന്നാല്‍ ക്ലാസ്സ് പരീക്ഷയ്ക്ക് പിറകേതന്നെ വരുന്ന ഓണപ്പരീക്ഷയും പിന്നീട് വരുന്ന ക്ലാസ്സ് പരീക്ഷയും പിന്നെ ക്രസ്തുമസ് പരീക്ഷയും വീണ്ടുമുണ്ടാകാറുള്ള ക്ലാസ്സ് പരീക്ഷയും അവസാനത്തെ വാര്‍ഷികപ്പരീക്ഷയും ഒക്കെ കുട്ടികളില്‍ പരീക്ഷ എന്ന് കേള്‍ക്കുമ്പോള്‍ ഉണ്ടാകുന്ന ഭയം ഇല്ലാതാക്കുവാന്‍ സഹായിക്കുന്നു.

എല്ലാംകൊണ്ടും വര്‍ണ്ണങ്ങള്‍ വിടര്‍ത്തുന്ന പൂക്കളുടെ നിറച്ചാര്‍ത്തുമായി എത്തുന്ന പൊന്നോണ മാസത്തില്‍ ഒരിക്കല്‍ ഞങ്ങളെ വിട്ടകന്ന ആ വിരുന്നുകാരനെ വരവേല്‍ക്കുവാന്‍ തയ്യാറെടുക്കുകയാണ് കേരളത്തിലെ ഓരോ വിദ്യാര്‍ത്ഥിയും...........................(എന്റെ അഭിപ്രായത്തെ അനുകൂലിക്കുന്നവരും പ്രതികൂലിക്കുന്നവരും ഉണ്ടാകാം. പ്രിയപ്പെട്ട കൂട്ടുകാരോടും ബഹുമാന്യരായ അദ്ധ്യാപകരോടും എന്റെ എളിയ ഒരു അഭ്യര്‍ത്ഥന....ദയവായി നിങ്ങളുടെ അഭിപ്രായങ്ങള്‍ comments രൂപത്തില്‍ നല്‍കിയാല്‍, അത് എന്റെ ബ്ലോഗെഴുത്തിന് ഒരു പ്രചോദനമാകും.)