മാതൃകയായി അധ്യാപകദമ്പതികള്‍

കണ്ണകന്നാൽ മനസ്സകലുമെന്നാണ്‌ പലരും പറയാറ്. ചിലപ്പോഴൊക്കെ അതൊരു സത്യവുമാണ്‌. എന്നാൽ സ്കൂൾ മാറിപ്പോയിട്ടും ഔദ്യോഗികജീവിതത്തില്‍ നിന്ന് തന്നെ വിരമിച്ചിട്ടും തങ്ങൾ പഠിപ്പിച്ച വിദ്യാലയത്തെ മറന്ന് പോവാതെ നെഞ്ചോട് ചേർത്ത് വെച്ച രണ്ടു പേർ നമുക്കെല്ലാം മാതൃകയാവുകയാണ്. നമ്മുടെ സ്കൂളിലെ ഹെഡ്മാസ്റ്ററായിരുന്ന ബാലകൃഷ്ണ ഷെട്ടിഗാർ മാഷും സീനിയര്‍ അധ്യാപികയായിരുന്ന പ്രസന്ന കുമാരി ടീച്ചറും. ഇന്നവർ രണ്ട് ക്ലാസ്സുമുറികൾ ടൈൽ പാകി സ്മാർട്ടാക്കി നമ്മുടെ കുട്ടികൾക്കായി സമ്മാനിച്ചിരിക്കുന്നു.
നന്ദി...
ഈ നാടിന്റെ നന്മയോടൊപ്പം സഞ്ചരിച്ചതിന്...
നമ്മുടെ മക്കൾക്കും അറിവിന്റെ പുതിയ ജാലകങ്ങൾ തുറക്കാൻ കൂട്ടിരുന്നതിന്...
അതിലുപരി ഈ കുഞ്ഞു വിദ്യാലയത്തെ സ്നേഹിച്ചതിന്...

നിങ്ങളുടെ ജീവിതത്തിൽ ഇനിയും ഒരുപാട് നന്മകൾ ഉണ്ടാവട്ടെ...

അഡൂര്‍ സ്കൂളിലെ ഓണാഘോഷം : കുഞ്ഞുമാവേലിയും കൂട്ടുകാരും എംഎല്‍എ ക്ക് ദുരിതാശ്വാസഫണ്ട് കൈമാറി

അഡൂര്‍ : അഡൂര്‍ ഗവ.ഹയര്‍ സെക്കന്ററി സ്കൂളില്‍ ലളിതമായ രീതിയില്‍ ഓണാഘോഷം സംഘടിപ്പിച്ചു. സംഭാവനപ്പെട്ടിയിലൂടെ മുഖ്യമന്ത്രിയുടെ ദുരിതാശ്വാസനിധിയിലേക്ക് ശേഖരിച്ച തുക മാവേലിയായി വേഷമിട്ട രണ്ടാം ക്ലാസുകാരന്‍ നിലനും കൂട്ടുകാരും ചേര്‍ന്ന് ഉദുമ എം.എല്‍.എ. കെ. കുഞ്ഞിരാമന് കൈമാറി. കാറഡുക്ക ബ്ലോക്ക പഞ്ചായത്ത് വൈസ് പ്രസിഡന്റ് സി.കെ. കുമാരന്‍, സ്കൂള്‍ വികസന സമിതി വര്‍ക്കിങ് ചെയര്‍മാന്‍ എ. ചന്ദ്രശേഖരന്‍, ദേലമ്പാടി ഗ്രാമപഞ്ചായത്തംഗം കമലാക്ഷി, പിടിഎ പ്രസിഡന്റ് ജെ.ഹരീഷന്‍, പ്രിന്‍സിപ്പാള്‍ പി. ലക്ഷ്മണന്‍, ഹെഡ്മാസ്റ്റര്‍ അനീസ് ജി. മൂസാന്‍, മുന്‍ പിടിഎ പ്രസിഡന്റ് എ.കെ. മുഹമ്മദ് ഹാജി, മദര്‍ പിടിഎ പ്രസിഡന്റ് ജയലക്ഷ്മി, സ്റ്റാഫ് കൗണ്‍സില്‍ സെക്രട്ടറി രാമചന്ദ്ര മണിയാണി, സീനിയര്‍ അസിസ്റ്റന്റ് പി.ശാരദ തുടങ്ങിയവര്‍ സംബന്ധിച്ചു. പ്രൈമറി വിഭാഗത്തിലെ കുട്ടികള്‍ നാടന്‍പൂക്കളുപയോഗിച്ച് പൂക്കളമിടുകയും വിവിധ നാടന്‍ കളികളിലേര്‍പ്പെടുകയും ചെയ്തു. ഹൈസ്കൂള്‍ കുട്ടികള്‍ ഓരോ ക്ലാസിലും ലാപ്ടോപ്പും പ്രോജക്റ്ററും ഉപയോഗപ്പെടുത്തി ഡിജിറ്റല്‍ പൂക്കളം ഉണ്ടാക്കി. ഉച്ചക്ക് കുട്ടികള്‍ക്കും രക്ഷിതാക്കള്‍ക്കും ഓണസദ്യയും പായസവും നല്‍കി.

കുടുംബശ്രീ അംഗങ്ങളെ കമ്പ്യൂട്ടര്‍ സാക്ഷരരാക്കാന്‍ അഡൂര്‍ സ്കൂളിലെ ലിറ്റില്‍ കൈറ്റ്സ് കൂട്ടുകാര്‍

അഡൂര്‍ : അഡൂര്‍ ഗവ. ഹയര്‍ സെക്കന്ററി സ്കൂളില്‍ കുടുംബശ്രീ അംഗങ്ങള്‍ക്കായി കമ്പ്യൂട്ടര്‍ സാക്ഷരതാക്ലാസ് സംഘടിപ്പിച്ചു. ദേലമ്പാടി സി.ഡി.എസിലെ വിവിധ യൂണിറ്റുകളില്‍പെട്ട മുപ്പത് കുടുംബശ്രീ അംഗങ്ങള്‍ സംബന്ധിച്ചു. ലിറ്റില്‍ കൈറ്റ്സ് അംഗങ്ങളായ കുട്ടികളാണ് അധ്യാപകരായത്. കുടുംബശ്രീ അംഗങ്ങള്‍ക്ക് അത്യാവശ്യം അറിഞ്ഞിരിക്കേണ്ട നോട്ടീസ്, അപേക്ഷഫോറം, പോസ്റ്റര്‍ മുതലായവ തയ്യാറാക്കല്‍, പ്രസന്റേഷന്‍, ഇന്റര്‍നെറ്റ് തുടങ്ങിയ കമ്പ്യൂട്ടര്‍ നൈപുണികളാണ് കുട്ടി അധ്യാപകര്‍ കുടുംബശ്രീ അംഗങ്ങളെ പരിശീലിപ്പിച്ചത്. കാറഡുക്ക ബ്ലോക്ക് പഞ്ചായത്ത് വൈസ് പ്രസിഡന്റ് സി.കെ. കുമാരന്‍ പരിശീലനപരിപാടി ഉദ്ഘാടനം ചെയ്തു. പിടിഎ പ്രസിഡന്റ് ജെ. ഹരീഷന്‍ അധ്യക്ഷത വഹിച്ചു. സ്കൂള്‍ വികസന സമിതി വര്‍ക്കിങ് ചെയര്‍മാന്‍ എ. ചന്ദ്രശേഖരന്‍, ദേലമ്പാടി ഗ്രാമപഞ്ചായത്തംഗം കമലാക്ഷി, കുടുംബശ്രീ സി.ഡി.എസ്. ചെയര്‍പേഴ്സണ്‍ ജയലക്ഷ്മി, സ്കൂള്‍ ഐടി കോഡിനേറ്റര്‍ സി.എച്ച്. പ്രഫുല്ലചന്ദ്ര, എ.എം. അബ്ദുല്‍ സലാം മാസ്റ്റര്‍ ആശംസകളര്‍പ്പിച്ചു. ഹെഡ്മാസ്റ്റര്‍ അനീസ് ജി.മൂസാന്‍ സ്വാഗതവും ലിറ്റില്‍ കൈറ്റ്സ് മാസ്റ്റര്‍ എ. ഹാഷിം നന്ദിയും പറഞ്ഞു.