'ഒറ്റ ഞാര്‍ വിപ്ലവം-അഡൂരിലും'

കൈവിട്ടുപോകുന്ന കാര്‍ഷിക സംസ്‌കൃതിയുടെ കാവലാളുകള്‍ ഞങ്ങള്‍...!!

 കുറച്ചു വിത്തില്‍ കൂടുതല്‍ വിളവ് എന്നതാണ് ഒറ്റ ഞാര്‍ കൃഷിരീതിയുടെ പ്രത്യേകത.സാധാരണ ഒരേക്കര്‍ സ്ഥലത്ത് നെല്‍കൃഷി ചെയ്യാന്‍ 30 കിലോ നെല്‍വിത്ത് വേണമെന്നിരിക്കേ ഒറ്റ ഞാറിന് ഒരേക്കറില്‍ രണ്ടു കിലോ വിത്ത് മതി. എട്ടുമുതല്‍ 11 ദിവസം വരെ മൂപ്പുള്ള ഞാര്‍ ഒരടി വിട്ടാണ് പറിച്ചുനടുന്നത്. ഇതുമൂലം കീടശല്യം കുറയും. കളകള്‍ എളുപ്പത്തില്‍ പറിക്കാനും കഴിയും. മികച്ച വിളവും ഇതുവഴി ലഭിക്കും.അഡൂരില്‍ പ്രതീക്ഷ സോഷ്യല്‍ വെല്‍ഫയര്‍ ഓര്‍ഗനൈസേഷന്റെ നേതൃത്വത്തില്‍ ഒരേക്കര്‍ സ്ഥലത്താണ്  ഇപ്പോള്‍ കൃഷി തുടങ്ങിയത്. അഞ്ച് വര്‍ഷത്തോളമായി തരിശായി കിടന്നിരുന്ന പാടത്താണ് കൃഷിയിറക്കിയത്.അന്യം നിന്നുപോകുന്ന കാര്‍ഷികസംസ്‌കൃതി പുതുതലമുറയ്ക്ക് പരിചയപ്പെടുത്തുന്നതിന്റെ ഭാഗമായി അഡൂര്‍ ഗവ.ഹയര്‍ സെക്കന്ററി സ്‌കൂളിലെ എസ്.പി.സി.(കുട്ടിപ്പൊലീസ്)അംഗങ്ങളാണ് ഞാര്‍ നട്ടത്. ഇതിലൂടെ എസ്.പി.സി. സ്ഥാപിച്ചതിന്റെ അഞ്ചാം വാര്‍ഷികാഘോഷം സ്‌മരണീയമായി. ഞാറ് നടീല്‍ കാറഡുക്ക ബ്ലോക്ക് പഞ്ചായത്ത് സ്ഥിരംസമിതി അദ്ധ്യക്ഷനും സ്‌കൂള്‍ പിടിഎ പ്രസിഡന്റുമായ സി.കെ.കുമാരന്‍ ഉദ്ഘാടനം ചെയ്തു.  പ്രതീക്ഷ സെക്രട്ടറി പ്രകാശ് അധ്യക്ഷതവഹിച്ചു. ദേലമ്പാടി ഗ്രാമപഞ്ചായത്ത് മെമ്പര്‍ രത്തന്‍ കുമാര്‍ പാണ്ടി,  കൃഷി ഓഫീസര്‍ രാഗവേന്ദ്ര, കൃഷി അസിസ്റ്റന്റ് പ്രകാശ് എന്നിവര്‍ നിര്‍ദ്ദേശങ്ങള്‍ നല്‍കി. സ്‌കൂള്‍ ഹെഡ്‌മിസ്‌ട്രസ് എന്‍.പ്രസന്നകുമാരി ആശംസകളര്‍പ്പിച്ചു. ബി.കൃഷ്ണപ്പ മാസ്റ്റര്‍ ഞാറ് നടീല്‍ പാട്ടിനെ കുട്ടികള്‍ക്ക് പരിചയപ്പെടുത്തി. എസ്.പി.സി.സി.പി.ഒ. എ.ഗംഗാധരന്‍ സ്വാഗതവും പി.എസ്.ബൈജു മാസ്റ്റര്‍ നന്ദിയും പറഞ്ഞു.For Video CLICK HERE For more Photos CLICK HERE For Mathrubhumi Report CLICK HERE

ലഹരിവിരുദ്ധദിനാചരണം

ലഹരിവസ്തുക്കളെ സമൂഹത്തില്‍ നിന്നും ഉന്മൂലനം ചെയ്യുന്നതിനുള്ള സന്ദേശം നല്‍കുന്നതിന്റെ ഭാഗമായി 'ലഹരിഭീകരന്റെ 'പ്രതീകാത്മകദഹനം നടത്തുന്നു

           ലഹരിവിരുദ്ധദിനാചരണത്തോടനുബന്ധിച്ച് അഡൂര്‍ സ്‌കൂളില്‍ രാവിലെ പ്രത്യേക അസംബ്ലി നടത്തി. ലഹരിവിരുദ്ധപ്രതിജ്ഞയും പ്രബന്ധാവതരണവും നടത്തി. ലഹരിവിരുദ്ധക്ലബ് പ്രസിഡന്റ് ജെ.ചൈതന്യ പ്രതിജ്ഞ ചൊല്ലിക്കൊടുത്തു. ഉച്ചക്ക്ശേഷം സ്‌കൂള്‍ ഹെല്‍ത്ത് ക്ലബിന്റെയും കുട്ടിപ്പൊലീസിന്റെയും നേതൃത്വത്തില്‍ 'ലഹരിഭീകര'നെയും വഹിച്ചുകൊണ്ടുള്ള ലഹരിവിരുദ്ധ റാലി നടത്തി.സിവില്‍ പൊലീസ് ഓഫീസര്‍(എസ്.പി.സി.)എ.ഗംഗാധരന്‍ നിര്‍ദ്ദേശങ്ങള്‍ നല്‍കി. തുടര്‍ന്ന് അഡൂര്‍ ടൗണില്‍വെച്ച് 'ലഹരിഭീകര'ന്റെ പ്രതീകാത്മകദഹനം നടത്തി. ഓഡിറ്റോറിയത്തില്‍വെച്ചുനടന്ന ബോധവല്‍ക്കരണക്ലാസ്സ് പി.ടി.എ. പ്രസിഡന്റ് സി.കെ.കുമാരന്‍ ഉദ്ഘാടനം ചെയ്തു. ഹെഡ്‌മിസ്ട്രസ്സ് ഇന്‍ ചാര്‍ജ് എന്‍. പ്രസന്നകുമാരി അദ്ധ്യക്ഷത വഹിച്ചു. കാസറഗോഡ് ജില്ലാ ടി.ബി.ഓഫീസര്‍ ഡോ.രവിപ്രസാദ് ക്ലാസ്സെടുക്കുകയും കുട്ടികളുടെയും രക്ഷിതാക്കളുടെയും സംശയങ്ങള്‍ക്ക് മറുപടി നല്‍കുകയും ചെയ്തു.ആദൂര്‍ സബ് ഇന്‍സ്പെക്ടര്‍ ദയാനന്ദന്‍ ആശംസകളര്‍പ്പിച്ചു. പിടിഎ എക്സിക്യൂട്ടീവ് അംഗം ഖാദര്‍ ചന്ദ്രംവയല്‍ സംബന്ധിച്ചു. ഹെല്‍ത്ത്ക്ലബ് കണ്‍വീനര്‍ എ.രാജാരാമ സ്വാഗതവും എസ്.പി.സി.ഇന്‍ ചാര്‍ജ് പി.ശാരദ ടീച്ചര്‍ നന്ദിയും പറഞ്ഞു.
For More Photos CLICK HERE

അദ്ധ്യാപകരും കുട്ടികളും നെല്‍വയലില്‍